ടി 20 എക്സ്പോ; കുതിച്ചുയര്‍ന്ന് ഇന്ത്യ -യുഎഇ വിമാന ടിക്കറ്റ് നിരക്ക്
ദുബായ്: ഒക്ടോബറില്‍ ആരംഭിച്ച എക്സ്പോ 2020ക്കൊപ്പം ട്വന്റി ട്വന്റി ക്രിക്കറ്റ് ലോകകപ്പ് കൂടി വന്നതോടെ ഇന്ത്യയില്‍ നിന്ന് യുഎഇയിലേക്കുള്ള വിമാന ടിക്കറ്റ് നിരക്ക് കുത്തനെ ഉയര്‍ന്നു. അടുത്ത കാലത്തൊന്നും നിരക്ക് കുറയില്ലെന്ന സൂചനയാണ് ട്രാവല്‍ രംഗത്ത് പ്രവര്‍ത്തിക്കുന്നവരില്‍ നിന്ന് ലഭിക്കുന്നത്.
ഡല്‍ഹിയില്‍ നിന്ന് ദുബായിലേക്ക് 800 ദിര്‍ഹം മുതല്‍ 1500 ദിര്‍ഹം വരെയാണ് നിലവിലെ ടിക്കറ്റ് നിരക്ക്. മുംബൈയില്‍ നിന്നുള്ള ചില സര്‍വീസുകള്‍ 2000 ദിര്‍ഹത്തിന് മുകളിലാണ് നിരക്ക് ഈടാക്കുന്നത്. ഇന്ത്യയും യുഎഇയും തമ്മില്‍ ബബ്ള്‍ കരാര്‍ നിലനില്‍ക്കുന്നതാണ് ടിക്കറ്റ് നിരക്ക് കുറയാതിരിക്കാനുള്ള കാരണങ്ങളിലൊന്നായി ചൂണ്ടിക്കാണിക്കപ്പെടുന്നത്. ഇതുപ്രകാരം നിശ്ചിത എണ്ണം സര്‍വീസുകള്‍ മാത്രമേ പാടുള്ളൂ എന്ന് വ്യവസ്ഥ ഉള്ളതിനാലാണിത്. കോവിഡ് പ്രതിസന്ധിയെ തുടര്‍ന്നാണ് വിവിധ രാജ്യങ്ങളുമായി ഇന്ത്യ ബബ്ള്‍ കരാര്‍ ഉണ്ടാക്കിയത്. ഔദ്യോഗിക വിമാന കമ്പനിക്ക് കൂടുതല്‍ പ്രയോജനം ലഭിക്കുന്നതാണ് കരാര്‍.
എല്ലാ വിമാനങ്ങള്‍ക്കും സര്‍വീസ് നടത്താന്‍ അവസരം ലഭിക്കുന്നതോടെ വിമാന ടിക്കറ്റ് കുറയുമെന്ന കണക്കുകൂട്ടലിലാണ് ഈ മേഖലയില്‍ പ്രവര്‍ത്തിക്കുന്നവര്‍. മാര്‍ച്ചില്‍ സീറ്റുകളുടെ കാര്യത്തില്‍ ലോകത്ത് രണ്ടാം സ്ഥാനമായിരുന്നു യുഎഇ- ഇന്ത്യ റൂട്ടിനുണ്ടായിരുന്നതെങ്കില്‍ കോവിഡ് രണ്ടാം വ്യാപനത്തെ തുടര്‍ന്നുള്ള യാത്രാ നിയന്ത്രണങ്ങള്‍ക്കു ശേഷം അത് ആദ്യ പത്തില്‍ പോലുമില്ലെന്നാണ് ഈ രംഗത്ത് പ്രവര്‍ത്തിക്കുന്ന ഏജന്‍സികളുടെ കണക്കുകള്‍ വ്യക്തമാക്കുന്നത്.
ടിക്കറ്റുകളുടെ ദൗര്‍ലഭ്യതയും നിരക്കും കാരണം പലരും ചാര്‍ട്ടേഡ് വിമാനങ്ങളെ പോലും ആശ്രയിക്കുന്ന സ്ഥിതിയാണ് ഈ റൂട്ടിലുള്ളത്. കഴിഞ്ഞ ജൂലൈ മുതല്‍ സപ്തംബര്‍ വരെ മുംബൈ അന്താരാഷ്ട്ര വിമാനത്താവളത്തില്‍ നിന്ന് മൂന്ന് ലക്ഷത്തിലേറെ യാത്രക്കാരാണ് ചാര്‍ട്ടേര്‍ഡ് വിമാനങ്ങളില്‍ യാത്ര ചെയ്തത്.
ഇപ്പോള്‍ തന്നെ ആയിരക്കണക്കിന് ക്രിക്കറ്റ് ആരാധകര്‍ ടി-20 ലോക കപ്പിനായി യുഎഇയില്‍ എത്തിക്കഴിഞ്ഞു. നവംബര്‍ 14 വരെ ഈ ഒഴുക്ക് തുടരാനാണ് സാധ്യത. അതോടൊപ്പം എക്സ്പോ കൂടിയായതോടെ നിരവധി വിനോദ സഞ്ചാരികളാണ് ദുബായിലേക്ക് യാത്ര തിരിക്കുന്നത്. മാര്‍ച്ച് വരെ ഈ തിരക്കും തുടരും. സെപ്തബര്‍ 30നും ഒക്ടോബര്‍ 10നും ഇടയില്‍ മാത്രം ലോകത്തിന്റെ വിവിധ ഭാഗങ്ങളില്‍ നിന്നായി അഞ്ച് ലക്ഷത്തോളം പേര് എക്സ്പോയിക്കായി എത്തിയതായാണ് ഔദ്യോഗിക കണക്ക്. ഇവരില്‍ വലിയൊരു ഭാഗം ഇന്ത്യയില്‍ നിന്നുള്ളവരാണ്.
