ചൈനീസ് ഇലക്ട്രിക്ക് വാഹന നിര്‍മ്മാതാക്കളായ ബിവൈഡി നിലവില്‍ അറ്റോ 3, ഇ6 എണ്‍ന്നീ എംപിവികള്‍ നമ്മുടെ വിപണിയില്‍ വില്‍ക്കുന്നുണ്ട്. ഈ സാമ്പത്തിക വര്ഷം അവസാനിക്കുന്നതിന് മുമ്പ് സീല്‍ ഇലക്ട്രിക് സെഡാന്‍ ഇന്ത്യന്‍ വിപണിയില്‍ അവതരിപ്പിക്കാനുള്ള പദ്ധതികള്‍ കമ്പനി നേരത്തെ വെളിപ്പെടുത്തിയിരുന്നു. സീല്‍ മാത്രമല്ല സീഗള്‍ കോംപാക്റ്റ് ഇലക്ട്രിക് ഹാച്ച്ബാക്ക് ഉള്‍പ്പെടെ ഒന്നിലധികം പുതിയ ഇവികള്‍ അവതരിപ്പിക്കാനും ഇപ്പോള്‍ കമ്പനി പദ്ധതിയിടുന്നുണ്ടെന്നാണ് പുതിയ റിപ്പോര്‍ട്ടുകള്‍.
ഇന്ത്യന്‍ വിപണിക്കായി ബിവൈഡി സീ ലയണ്‍, സീഗള്‍ എന്നിങ്ങനെ രണ്ട് പേരുകള്‍ ട്രേഡ്മാര്‍ക്ക് ചെയ്തിട്ടുണ്ട് . ബിവൈഡി ആഗോളതലത്തില്‍ ഒരു പുതിയ ഇവി പരീക്ഷിക്കുന്നതിനാല്‍ സീ ലയണ്‍ തികച്ചും പുതിയൊരു ഉല്‍പ്പന്നമായിരിക്കുമെന്ന് പ്രതീക്ഷിക്കുന്നു. ഈ വാഹനം 204bhp ആര്‍ഡബ്ല്യുഡി, 530bhp എഡബ്ല്യുഡി എന്നിങ്ങനെ രണ്ട് പതിപ്പുകളില്‍ വരുമെന്നും റിപ്പോര്‍ട്ടുകള്‍ ഉണ്ട് . ഡ്യുവല്‍-ഇലക്ട്രിക് മോട്ടോറുകള്‍. 82.5kWh ബാറ്ററി പാക്ക് ഫീച്ചര്‍ ചെയ്യുമെന്നും 700km വരെ റേഞ്ച് വാഗ്ദാനം ചെയ്യുമെന്നും പ്രതീക്ഷിക്കുന്നു.
'ഇന്ത്യന്‍ കാര്‍സമുദ്രത്തില്‍' മുങ്ങിപ്പൊങ്ങാന്‍ ചൈനീസ് 'കടല്‍ സിംഹം'; 'സീ ലയണ്‍' പേറ്റന്റ് നേടി ബിവൈഡി
ബിവൈഡി സീഗല്‍ സബ്‌കോംപാക്ട ഇലക്ട്രിക് ഹാച്ച്ബാക്ക് ഷാങ്ഹായ് 2023 ഓട്ടോഷോയില്‍ അവതരിപ്പിച്ചു. ഈ ബി-സെഗ്മെന്റ് ഹാച്ച്ബാക്കിന്റെ വില 11,400 ഡോളര്‍ അല്ലെങ്കില്‍ 78,800 യുവാന്‍ (ഏകദേശം 9.35 ലക്ഷം രൂപ) ആണ്. ഇത് ബ്രാന്‍ഡിന്റെ ഇന്നുവരെയുള്ള ഏറ്റവും വിലകുറഞ്ഞ ഇവി ആണ്. കമ്പനിയുടെ ഇ-പ്ലാറ്റ്‌ഫോം 3.0 അടിസ്ഥാനമാക്കിയുള്ളതാണ് ഈ ഇവി. ഇതേ പ്ലാറ്റ്‌ഫോം ബിവൈഡി ഡോള്‍ഫിനും ബിവൈഡി സീലിനും അടിവരയിടുന്നു. 55 കിലോവാട്ട് (74 എച്ച്പി) റേറ്റുചെയ്ത മുന്‍വശത്ത് ഘടിപ്പിച്ച ഇലക്ട്രിക് മോട്ടോറുമായാണ് ഇത് വരുന്നത്. 30kWh, 38kWh എന്നിങ്ങനെ രണ്ട് ബാറ്ററി പാക്ക് ഓപ്ഷനുകളില്‍ ഹാച്ച്ബാക്ക് ലഭ്യമാണ് - യഥാക്രമം 305കിമി, 405കിമി സിഎല്‍ടിസി റേഞ്ച് വാഗ്ദാനം ചെയ്യുന്നു.
ഈ ഹാച്ച്ബാക്ക് ഡിസി ഫാസ്റ്റ് ചാര്‍ജിംഗിനെ പിന്തുണയ്ക്കുന്നു. ബാറ്ററി 80 ശതമാനം വരെ ചാര്‍ജ് ചെയ്യാന്‍ ഏകദേശം 30 മിനിറ്റ് എടുക്കും. ബിവൈഡി സീഗലിന് 3,780 എംഎം നീളവും 1,715 എംഎം വീതിയും 1,540 എംഎം ഉയരവും 2,500 എംഎം വീല്‍ബേസും ഉണ്ട്. എല്‍ഇഡികളുള്ള ഷാര്‍പ്പായ ഹെഡ്ലൈറ്റുകളുള്ള അടച്ച മുന്‍ഭാഗം, വലിയ വിന്‍ഡ്ഷീല്‍ഡ്, ഫ്‌ലോട്ടിംഗ് റൂഫ് ഡിസൈന്‍, കണക്റ്റുചെയ്ത എല്‍ഇഡി ടെയില്‍-ലൈറ്റുകള്‍, റൂഫ് സ്പോയിലര്‍ എന്നിവ ഉള്‍ക്കൊള്ളുന്ന ചെറിയ കാര്‍ ഫങ്കി ലുക്കിലാണ് വരുന്നത്. ഇതിന് അഞ്ച് ഇഞ്ച് ഇന്‍സ്ട്രുമെന്റ് കണ്‍സോളും ഫ്രീ-സ്റ്റാന്‍ഡിംഗ് 12.8 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സ്‌ക്രീനും ഫ്‌ലാറ്റ്-ബോട്ടം സ്റ്റിയറിംഗ് വീലും ലഭിക്കുന്നു.
ബിവൈഡി സീഗലിന്റെ കൃത്യമായ ലോഞ്ച് വിശദാംശങ്ങള്‍ ഇതുവരെ വെളിപ്പെടുത്തിയിട്ടില്ല. രാജ്യത്ത് ഒരു എന്‍ട്രി ലെവല്‍ ഓഫറായി ബിവൈഡി സീഗലിനെ അവതരിപ്പിക്കാന്‍ സാധ്യതയുണ്ട് എന്നാണ് റിപ്പോര്‍ട്ടുകള്‍. ഈ മോഡല്‍ കമ്പനിക്ക് മികച്ച വില്‍പ്പ നേടിക്കൊടുക്കാന്‍ സാധ്യതയുണ്ട്. കാരണം ഇത് ഒരു വലിയ റേഞ്ചിലുള്ള താങ്ങാനാവുന്ന ഓഫറായിരിക്കും. വിലയുടെ അടിസ്ഥാനത്തിലാണെങ്കില്‍ ഈ ഹാച്ച്ബാക്ക് സിട്രോണ്‍ eC3, ടാറ്റ ടിയാഗോ ഇവി എന്നിവയെ വിപണിയില്‍ നേരിടും.
