ദില്ലി: തെരുവുനായ പ്രശ്നത്തില് സുപ്രധാന ഉത്തരവുമായി സുപ്രീം കോടതി. റോഡുകളില് നിന്നും പൊതുയിടങ്ങളില് നിന്നും തെരുവുനായ്ക്കളെ നീക്കണമെന്നും നിരീക്ഷണത്തിനായി പട്രോളിങ് സംഘത്തെ നിയോഗിക്കണമെന്നും സുപ്രീം കോടതി ഇടക്കാല ഉത്തരവിറക്കി. ദേശീയപാതയടക്കം റോഡുകളില് നിന്ന് കന്നുകാലികള്, നായ്ക്കള് എന്നിവയടക്കമുള്ള മൃഗങ്ങളെ സുരക്ഷിത കേന്ദ്രങ്ങളിലേക്ക് മാറ്റാനാണ് നിര്ദേശം. ഇതിന് സര്ക്കാരുകളും ദേശീയപാത അതോറിറ്റികളും നടപടി സ്വീകരിക്കണം. മൃഗങ്ങളെ കണ്ടെത്താന് പെട്രോളിങ് സംഘത്തെ നിയോഗിക്കണം. സര്ക്കാര് ഓഫീസുകള്, സ്പോര്ട്സ് കോംപ്ലക്സുള്, ബസ് സ്റ്റാന്ഡ് റെയില്വേ സ്റ്റേഷന് ഉള്പ്പെടെയുള്ള പൊതുവിടങ്ങളില് നിന്ന് തെരുവ് നായ്ക്കളെ നീക്കാന് എല്ലാ സംസ്ഥാന സര്ക്കാരുകളും നടപടി സ്വീകരിക്കണം.
വിദ്യാഭ്യാസ സ്ഥാപനങ്ങള് അടക്കം നായ്ക്കള് കയറാതിരിക്കാന് നടപടികള് ഉണ്ടാകണം. ഇക്കാര്യത്തില് ദിവസേനയുള്ള പരിശോധന നടത്തണം. ദേശീയപാതകളില് നിന്ന് മൃഗങ്ങളെ നീക്കിയ നടപടിയില് എട്ട് ആഴ്ചയ്ക്കുള്ളില് നടപടി സ്വീകരിക്കണം. നടപ്പിലാക്കിയ കാര്യങ്ങള് ചീഫ് സെക്രട്ടറിര്മാര് സുപ്രീംകോടതിയെ അറിയിക്കണം. പിടികൂടുന്ന തെരുവ് നായ്ക്കളെ ഷെല്ട്ടര് ഫോമുകളിലേക്ക് മാറ്റി വന്ധ്യകരിക്കണം. ഇതിനായുള്ള നടപടികള് മുന്സിപ്പല് കോര്പ്പറേഷന് അടക്കം തദ്ദേശസ്ഥാപനങ്ങള് സ്വീകരിക്കണം. പിടികൂടുന്ന നായ്ക്കളെ വന്ധീകരണത്തിനുശേഷം പിടിച്ച അതേസ്ഥലത്ത് തുറന്നുവിടരുതെന്നും ഉത്തരവിട്ടു. ആശുപത്രികള് അടക്കം പൊതുവിടങ്ങളില് നായ്ക്കള് കയറാതിരിക്കാന് സംവിധാനം ഒരുക്കണമെന്നും സുപ്രീം കോടതി ഇടക്കാല ഉത്തരവില് വ്യക്തമാക്കി.
