അഹമ്മദാബാദ്: രാജ്യത്തെ നടുക്കിയ അഹമ്മദാബാദ് വിമാനാപകടത്തില് മരണം മുന്നൂറിനോട് അടുക്കുന്നു. 294 പേര് മരിച്ചെന്നാണ് ഇതുവരെ സ്ഥിരീകരിച്ചത്. 265 മൃതദേഹങ്ങളാണ് പ്രദേശത്ത് നിന്ന് കണ്ടെത്തിയത്. ആറ് പേരുടെ മൃതദേഹങ്ങള് ബന്ധുക്കള്ക്ക് കൈമാറി. കൂടുതല് പ്രദേശവാസികളെ കാണാനില്ലെന്നാണ് അവരുടെ ബന്ധുക്കള് അറിയിക്കുന്നത്. മരണസംഖ്യ ഇനിയും ഉയര്ന്നേക്കാമെന്ന് പൊലീസും വ്യക്തമാക്കി. അപ്രതീക്ഷിതമായുണ്ടായ അപകടത്തിന്റെ ഞെട്ടലിലാണ് ഇപ്പോഴും പ്രദേശവാസികള്. അതിനിടെ, ദുരന്തത്തിന്റെ ആഘാതം പ്രധാനമന്ത്രി നരേന്ദ്രമോദി നേരിട്ടെത്തി വിലയിരുത്തി. അപകടത്തില് പരിക്കേറ്റ് ആശുപത്രിയില് ഉള്ളവരെയും പ്രധാനമന്ത്രി സന്ദര്ശിച്ചു. വിമാനത്തില് നിന്ന് അത്ഭുതകരമായി രക്ഷപ്പെട്ട വിശ്വാസ് കുമാറിനോട് ഏറെ നേരം മോദി സംസാരിച്ചു. ഉന്നതതല യോഗത്തിലും പ്രധാനമന്ത്രി പങ്കെടുത്തു.
സര്ദാര് വല്ലഭായ് പട്ടേല് രാജ്യാന്തര വിമാനത്താവളത്തില് നിന്ന് ലണ്ടനിലേക്ക് പുറപ്പെട്ട എയര് ഇന്ത്യയുടെ ബോയിങ് 787 8 ഡ്രീംലൈനര് വിമാനമാണ് ടേക്ക് ഓഫിനിനിടെ തകര്ന്നത്. ഇന്നലെ ഉച്ചക്ക് 1:38 നാണ് അപകടമുണ്ടായത്. അഹമ്മദാബാദ് അന്താരാഷ്ട്ര വിമാനത്താവളത്തിലെ 23-ാം നമ്പര് റണ്വേയില് നിന്ന് എഐ 171 ബോയിംഗ് 787 ഡ്രീലൈംനര് വിമാനം ലണ്ടനിലേക്ക് പറന്നുയര്ന്നു. 625 അടി ഉയരത്തിലെത്തിയ വിമാനത്തില് നിന്ന് എയര് ട്രാഫിക് കണ്ട്രേളിലേക്ക് അപായ സന്ദേശം ലഭിച്ചു. വിമാനവുമായി ബന്ധപ്പെടാന് ശ്രമിച്ചെങ്കിലും സിഗ്നല് ലഭിച്ചില്ല. പിന്നാലെ തകര്ന്നു വീഴുകയായിരുന്നു. വിമാനത്താവളത്തിന് സമീപമുള്ള ബിജെ മെഡിക്കല് കോളേജിന്റെ ഹോസ്റ്റല് കെട്ടിടത്തിലേക്കാണ് വിമാനം തകര്ന്നു വീണത്. ക്യാബിന് ക്രൂ അംഗങ്ങളടക്കം 242 പേരാണ് വിമാനത്തിലുണ്ടായിരുന്നത്. ഇതില് ഒരാളെ മാത്രമാണ് ജീവനോടെ കണ്ടെത്തിയത്.
പ്രദേശവാസികളും വിമാനം വീണ് തകര്ന്ന മെഡിക്കല് കോളേജ് ഹോസ്റ്റല് കെട്ടിടത്തിലുണ്ടായിരുന്ന മെഡിക്കല് വിദ്യാര്ത്ഥികളുമാണ് മരിച്ച മറ്റുള്ളവര്. അപകടത്തില് പരിക്കേറ്റ 12 പേരുടെ നില ഗുരുതരമായി തുടരുകയാണ്. കനത്ത ആഘാതമാണ് വിമാനം ഇടിച്ചിറങ്ങിയ ബി ജെ മെഡിക്കല് കോളേജ് ഹോസ്റ്റലിനുണ്ടായത്. ഇവിടെ ജീവന് നഷ്ടമായവരില് എംബിബിഎസ് വിദ്യാര്ത്ഥികളും ഒരു പിജി റെസിഡന്റ് ഡോക്ടറും ഉള്പ്പെടുന്നു. 60 വിദ്യാര്ത്ഥികള് പരിക്കേറ്റ് ചികിത്സയിലാണ്. അതിനിടെ, വിമാനത്തിന്റെ ഡിജിറ്റല് വീഡിയോ റെക്കോഡര് കണ്ടെത്തി. അപകടം നടന്നയിടത്തുനിന്നാണ് ?ഗുജറാത്ത് എടിഎസ് ഡിവിആര് കണ്ടെത്തിയത്. അവശിഷ്ടങ്ങള്ക്കിടയില് നിന്നാണ് ഇത് കണ്ടെത്തിയതെന്നും, ഫോറന്സിക് ലാബിന് കൈമാറുമെന്നും ഉദ്യോഗസ്ഥര് അറിയിച്ചു.
