ഫ്‌ളിപ്കാര്‍ട്ട് ബിഗ് ബില്യണ്‍ ഡെയ്സ്; ഐഫോണ്‍ 12 വില്‍പ്പനയ്‌ക്കെത്തുക ആകര്‍ഷകമായ വിലയില്‍
ഈ മാസം പതിനാലിനാണ് അമേരിക്കന്‍ ടെക് ഭീമന്മാരായ ആപ്പിള്‍ ഐഫോണ്‍ 13 അവതരിപ്പിച്ചത്. ഐഫോണ്‍ 13, ഐഫോണ്‍ 13 മിനി, ഐഫോണ്‍ 13 പ്രോ, ഐഫോണ്‍ 13 പ്രോ മാക്‌സ് എന്നിങ്ങനെ നാല് ഫോണുകള്‍ ഉള്‍കൊള്ളുന്ന ഐഫോണ്‍ 13 ശ്രേണിയ്ക്ക് ഇന്ത്യയില്‍ 69,900 രൂപ മുതല്‍ 1.80 ലക്ഷം വരെയാണ് വില. ഐഫോണ്‍ 13 വന്നതിന് പിന്നാലെ കഴിഞ്ഞ വര്‍ഷമെത്തിയ ഐഫോണ്‍ 12 മോഡലുകളുടെ വില ആപ്പിള്‍ കുറച്ചിരുന്നു.
ഐഫോണ്‍ 12ന്റെ 64 ജിബി സ്റ്റോറേജ് ഓപ്ഷന് 65,900 രൂപയാണ് പുതിയ വില. 128 ജിബി പതിപ്പിന്റെ വില അതെ സമയം 70,900 രൂപയായും 256 ജിബി സ്റ്റോറേജ് വേരിയന്റിന്റെ വില 80,900 രൂപയായും കുറഞ്ഞിട്ടുണ്ട്. ഏകദേശം 14,000 രൂപയോളമാണ് ആപ്പിള്‍ കുറച്ചത്. 2020 ഒക്ടോബറില്‍ ഐഫോണ്‍ 12 അവതരിപ്പിച്ചപ്പോള്‍ 64 ജിബി സ്റ്റോറേജ് ഓപ്ഷന് 79,900 രൂപയും, 128 ജിബി സ്റ്റോറേജ് വേരിയന്റിന് 84,900 രൂപയും, 256 ജിബി സ്റ്റോറേജ് മോഡലിന് 94,900 രൂപയുമായിരുന്നു വില.
എന്നാല്‍ ഇതിലും വിലക്കുറവില്‍ ഐഫോണ്‍ 12 വാങ്ങണം എന്നാഗ്രഹമുണ്ടോ? എങ്കില്‍ ഒക്ടോബര്‍ മൂന്നിന് ആരംഭിക്കുന്ന ഫ്‌ലിപ്കാര്‍ട്ട് ബിഗ് ബില്യണ്‍ ഡേയ്‌സ് സെയ്ല്‍ 2021 മികച്ച ഒരവസരമാണ്. മെഗാ ഡിസ്‌കൗണ്ട് മേളയ്ക്ക് മുന്‍പായി ഫ്‌ലിപ്കാര്‍ട്ട് പുറത്ത് വിട്ട ടീസര്‍ അനുസരിച്ച് ഐഫോണ്‍ 12 ബിഗ് ബില്യണ്‍ ഡെയ്സ് സെയ്ലില്‍ വില്‍ക്കുക 49,999 രൂപ മുതലാണ്. അതായത് ഇപ്പോഴത്തെ വിലയേക്കാള്‍ 15,901 രൂപ ഡിസ്‌കൗണ്ടില്‍ ഐഫോണ്‍ 12 വാങ്ങാം.
49,999 രൂപയ്ക്ക് വിപണിയില്‍ ലഭ്യമായ മികച്ച പ്രീമിയം സര്‍ട്ട്‌ഫോണുകളില്‍ ഒന്നാണ് ഐഫോണ്‍ 12. സെറാമിക് ഷീല്‍ഡ് ഗ്ലാസ് കവറുള്ള സൂപ്പര്‍ റെറ്റിന XDR ഓഎല്‍ഇഡി ഡിസ്‌പ്ലെയുള്ള 6.1-ഇഞ്ച് സ്‌ക്രീന്‍ ആണ് ഐഫോണ്‍ 12ന്. A14 ബയോണിക് ചിപ്പ് ആണ് ഐഫോണ്‍ 12-ന്റെ ഹൃദയം. 4K വീഡിയോ എഡിറ്റിംഗ് വരെ പുഷ്പം പോലെ കൈകാര്യം ചെയ്യാന്‍ പറ്റുന്ന വിധമാണ് A14 ബയോണിക് ചിപ്പ് തയ്യാറാക്കിയിരിക്കുന്നത്.
വൈഡ്-ആംഗിള്‍, അള്‍ട്രാ വൈഡ്-ആംഗിള്‍ ഷൂട്ടറുകളുള്ള 12-മെഗാപിക്സല് ഡ്യുവല്‍ റിയര്‍ ക്യാമെറയാണ് ഐഫോണ്‍ 12-ല്‍. 12-മെഗാപിക്സല് സെല്‍ഫി ക്യാമെറയാണ് ക്രമീകരിച്ചിരിക്കുന്നത്. 17 മണിക്കൂര്‍ വരെ വീഡിയോ പ്ലേബാക്ക് നല്‍കുന്ന ബാറ്ററിയാണ് ഐഫോണ്‍ 12ല്‍ ക്രമീകരിച്ചിരിക്കുന്നത്. 15W വരെ മാഗ് സേഫ് വയര്‍ലെസ് ചാര്‍ജിംഗിനെയും 7.5W വരെ ക്യു വയര്‍ലെസ് ചാര്‍ജിംഗിനെയും ഐഫോണ്‍ 12 പിന്തുണയ്ക്കും. കറുപ്പ്, നീല, പച്ച, പ്രോഡക്റ്റ് (റെഡ്), വെളുപ്പ് നിറങ്ങളിലാണ് ഐഫോണ്‍ 12 വാങ്ങാവുന്നത്.
