എംജി ആസ്റ്ററിന്റെ വില്‍പ്പന ഒക്ടോബറില്‍ ആരംഭിക്കും
പുതിയ മോഡലായ ആസ്റ്ററിനെ (Astor) അടുത്തിടെയാണ് ചൈനീസ് വാഹന നിര്‍മ്മാതാക്കളായ എംജി മോട്ടോഴ്സ് (MG Motors) വിപണിയില്‍ അനാവരണം ചെയ്തത്. ഈ മിഡ്-സൈസ് എസ്യുവിക്കായുള്ള (Mid Size SUV) വില്‍പ്പന 2021 ഒക്ടോബറില്‍ ആരംഭിക്കുമെന്നാണ് പുതിയ റിപ്പോര്‍ട്ടുകള്‍. നവരാത്രി ആഘോഷങ്ങള്‍ക്ക് തുടക്കമാവുന്ന ഒക്ടോബര്‍ ഏഴിനായിരിക്കും ഓണ്‍ലൈനിലൂടെ ഫ്‌ലാഷ് സെയിലിന് (Flash Sale) തുടക്കമാകുക എന്ന് ടീംബിഎച്ച്പി (Teanm BHP) റിപ്പോര്‍ട്ട് ചെയ്യുന്നു.
വാഹനത്തിന്റെ വില, വേരിയന്റ്, ഫീച്ചര്‍ വിശദാംശങ്ങള്‍ എന്നിവ അടുത്ത മാസം ആദ്യം എംജി മോട്ടോര്‍സ് പ്രഖ്യാപിക്കും. ആസ്റ്റര്‍ വില്‍പ്പനയ്ക്ക് എത്തുന്നതോടെ വിതരണ ശൃംഖല സ്ഥിരമാകുമ്പോള്‍ പ്രതിമാസം 7,000 മുതല്‍ 8,000 യൂണിറ്റുകള്‍ വരെ വിറ്റഴിക്കാനാണ് കമ്പനി ലക്ഷ്യമിടുന്നത്.
10 ലക്ഷം മുതല്‍ 17 ലക്ഷം രൂപ വരെയാകും ആസ്റ്റര്‍ എസ്യുവിക്ക് മുടക്കേണ്ടി വരുന്ന എക്‌സ്‌ഷോറൂം വിലയെന്നാണ് സൂചന. ഈ വില ശ്രേണിയില്‍ ഹ്യുണ്ടായി ക്രെറ്റ, സ്‌കോഡ കുഷാഖ്, കിയ സെല്‍റ്റോസ്, വരാനിരിക്കുന്ന ഫോക്സ്വാഗണ് ടൈഗൂണ്‍ എന്നിവയ്ക്കെതിരെ ഇത് നേര്‍ക്കുനേര്‍ മത്സരിക്കും. സ്‌റ്റൈല്‍, സൂപ്പര്‍, സ്മാര്‍ട്ട്, ഷാര്‍പ്പ്, സാവി എന്നിങ്ങനെ അഞ്ച് വേരിയന്റുകളില്‍ പുതിയ എംജി എസ്യുവി വരുമെന്നാണ് സൂചന.
ഇവി മോഡലായ ഇസഡ്എസിന്റെ പെട്രോള്‍ പവര്‍ പതിപ്പാണ് ആസ്റ്റര്‍. ഹെക്ടറിന് താഴെയായിട്ടായിരിക്കും എം.ജി ഇന്ത്യന്‍ നിരയില്‍ ആസ്റ്റര്‍ സ്ഥാനം പിടിക്കുക. സാഗ്രിയ റെഡ്, ഐകോണിക് ഐവറി ഡ്യൂവല്‍ കളറുകളും ട്യൂക്സെഡോ ബ്ലാക്കുമടക്കം മൂന്നു തരം ഇന്റീരിയര്‍ കളറുകളില്‍ വാഹനം തെരെഞ്ഞെടുക്കാം.
ആര്‍ട്ടിഫിഷ്യല്‍ ഇന്റലിജന്റ്സില്‍ അധിഷ്ടിതമായ പേഴ്സണല് അസിസ്റ്റന്റ് വഴി ഉപഭോക്താവിന്റെ ശബ്ദ സന്ദേശത്തിന് അനുസരിച്ച് നിരവധി സൗകര്യങ്ങളാണ് എം.ജി ആസ്റ്ററിലുള്ളത്. ഹെഡ് ടര്‍ണര്‍, വിക്കിപീഡിയ, തമാശ, വാര്‍ത്ത, ഇമോജി, ചിറ്റ്ചാറ്റ്, നാവിഗേഷന്‍, കാര്‍ കണ്‍ട്രോളിംഗ് സംവിധാനം, കാര്‍ സംബന്ധിയായ മുന്നറിയിപ്പ് തുടങ്ങീ 80 ഇന്റര്‍നെറ്റ് ഫീച്ചറുകള്‍ കാറിലുണ്ട്. ജിയോ ഇ-സിം വഴി ബന്ധിപ്പിച്ചാണ് ഇത്തരം സൗകര്യങ്ങള്‍ നല്‍കുന്നത്. ഇതിനായി 10.1 ഇഞ്ച് ടെച്ച്സ്‌ക്രീന്‍ ഇന്‍ഫോടൈന്‍മെന്റ് സംവിധാനം സജ്ജീകരിച്ചിട്ടുണ്ട്.
ഏഴ് എയര്‍ബാഗുകള്‍, ഹെഡ്ലാമ്പ് കണ്‍ട്രോള്‍, ബ്ലൈന്‍ഡ് സ്പോട്ട് ഡിറ്റക്ഷന്‍, റിയര്‍ ക്രോസ് ട്രാഫിക് അലേര്‍ട്ട്, സ്പീഡ് അസിസ്റ്റ് സിസ്റ്റം, ലൈന്‍ കീപ് അസിസ്റ്റ്, ഫോര്‍വേഡ് കോളിഷന്‍ വാണിഗ് എന്നിങ്ങനെ 27 ഫീച്ചറുകളാണ് സുരക്ഷക്കായി ആസ്റ്ററിലുള്ളത്. എം.ജി ഗ്ലോസ്റ്റര്‍, മഹീന്ദ്ര എക്സ്.യു.വി700 എന്നിവയിലേത് പോലെ ആസ്റ്ററില്‍ അഡ്വാന്‍സ്ഡ് ഡ്രൈവിംഗ് അസിസ്റ്റന്റ് സിസ്റ്റം (അഡാസ്) ലെവല്‍ 2 സംവിധാനവുമുണ്ട്.
രണ്ട് പെട്രോള്‍ എന്‍ജിന്‍ ഒപ്ഷനുകളാണ് ആസ്റ്ററിലുള്ളത്. ഒന്നാമത്തേത് ഒന്നര ലിറ്റര്‍ ശേഷിയുള്ള നാച്ചുറലി ആസ്പിരേറ്റഡ് പെട്രോള്‍ എന്‍ജിനാണ്. 110 എച്ച്.പി പവറും 144 എന്‍.എം ടോര്‍ക്കുമാണ് ഇതിനുള്ളത്. എട്ട് സ്റ്റെപ് സി.വി.ടി ഓട്ടോമാറ്റിക് ഗിയര്‍ബോക്സും മാന്വല്‍ ഗിയര്‍ബോക്സും ഇതിലുണ്ട്. 1.3 ലിറ്റര്‍ ഡര്‍ബോ പെട്രോള്‍ എന്‍ജിനാണ് രണ്ടാമത്തെ ഒപ്ഷന്‍. 140 എച്ച്.പി പവറും 220 എന്‍.എം ടോര്‍ക്കും ഈ എന്‍ജിന്‍ ഉല്‍പ്പാദിപ്പിക്കും. സിക്സ് സ്പീഡ് ഓട്ടോമാറ്റിക് ഗിയര്‍ ബോക്സ് ഒപ്ഷനില്‍ മാത്രമാണ് ഈ മോഡല്‍ എത്തുക.
മൂന്നു തരം സ്റ്റിയറിംഗ് മോഡുകള്‍ ഈ എസ്.യു.വിയിലുണ്ടാകും. 90 ശതമാനം വരെ കവറേജുള്ള സ്‌കൈ റൂഫ്, മുന്നിലും പിന്നിലുമുള്ള യാത്രികര്‍ക്ക് ആംറെസ്റ്റ് എന്നിവ ആസ്റ്ററിന്റെ സവിശേഷതയാണ്. 4323 എം.എം ആണ് കാറിന്റെ മൊത്തം നീളം. 1650 എം.എം ഉയരവും 1809 എം.എം വീതിയുമാണ്.
