കൊവിഡിനിടെ കുത്തനെ ഉയര്‍ന്ന് സ്വര്‍ണ വില
കൊച്ചി: സംസ്ഥാനത്ത് സ്വര്‍ണ വിലയില്‍ വന്‍ വര്‍ധന. 400 രൂപ ഉയര്‍ന്ന് ഒരു പവന് സ്വര്‍ണത്തിന് ഇന്ന് 35,600 രൂപയാണ് വില. ഒരു ഗ്രാമിന് 4,450 രൂപയും. ഈ ആഴ്ചയിലെ ഏറ്റവും ഉയര്‍ന്ന നിരക്കാണിത്. രാജ്യാന്തര വിപണിയിലും സ്വര്‍ണ വില ഉയര്‍ന്നു. സ്പോട് ഗോള്‍ഡ് ട്രോയ് ഔണ്‍സിന് 1,819.74 ഡോളറാണ് വില. രണ്ട് ദിവസംകൊണ്ട് പവ് 480 രൂപയാണ് വര്‍ധിച്ചത്.
മെയ് ഒന്ന്, രണ്ട് തീയതികളില്‍ 35,040 രൂപയായിരുന്നു സ്വര്‍ണ വില. ഇതാണ് ഈ ആഴ്ചയിലെ ഏറ്റവും കുറഞ്ഞ നിരക്ക്. നിലവിലെ സ്വര്‍ണ വിലയുമായി താരതമ്യം ചെയ്യുമ്പോള്‍ 560 രൂപയുടെ വ്യത്യാസമാണ് ഉള്ളത്. കൊവിഡ്-19 പകര്‍ച്ചവ്യാധി രൂക്ഷമാകുന്നതിനിടെയാണ് സ്വര്‍ണ വില കുത്തനെ ഉയരുന്നതെന്നതാണ് ശ്രദ്ധേയം. കഴിഞ്ഞ കുറച്ച് ദിവസങ്ങളായി വിലയില്‍ വലിയ ചാഞ്ചാട്ടമാണ് ഉണ്ടാകുന്നത്.
