തമിഴ്നാട്ടില് ലോക്ഡൗണ്‍ നീട്ടി
ചെന്നൈ: തമിഴ്നാട്ടില് കോവിഡ് പ്രതിരോധത്തിന്റെ ഭാഗമായി ഏര്‍പ്പെടുത്തിയ ലോക്ഡൗണ്‍ നീട്ടി. ഈ മാസം 19 വരെയാണ് നീട്ടിയത്. ചില ഇളവുകള്‍ നല്‍കിക്കൊണ്ടാണ് ലോക്ഡൗണ്‍ നീട്ടിക്കൊണ്ട് സര്‍ക്കാര്‍ ഉത്തരവിറക്കിയത്.
കടകള്‍ക്ക് ഇനി മുതല്‍ 9 മണി വരെ പ്രവര്‍ത്തിക്കാം. റസ്റ്ററന്റുകള്‍, ചായക്കടടകള്‍ ബേക്കറികള്‍, തട്ടുകടകള്‍ എന്നിവയ്ക്ക് പകുതി ആളുകളെ പ്രവേശിപ്പിച്ച് ഒന്‍പതുമണിവരെ തുറക്കാം. കോവിഡ് പ്രോട്ടോക്കോള്‍ കൃത്യമായി പാലിക്കണമെന്നും പ്രവേശന കവാടത്തില്‍ സാനിറ്റൈസറുകള്‍ സ്ഥാപിക്കണമെന്നും സര്‍ക്കാര്‍ നിര്‍ദേശിച്ചു. പുറത്ത് ക്യൂ രൂപപ്പെടുകയാണെങ്കില്‍ സാമൂഹ്യ അകലം പാലിക്കണം. എസി ഷോപ്പുകള്‍ ആണെങ്കില്‍ വെന്റിലേഷന്‍ ഉറപ്പുവരുത്താനായി വാതിലോ ജനാലയോ തുറന്നിടണം.
വിവാഹത്തില്‍ 50 പേര്‍ക്ക് പങ്കെടുക്കാം. ശവസംസ്‌കാര ചടങ്ങുകളില്‍ ഇരുപത് പേര്‍ക്കാണ് അനുമതിയുള്ളത്. അതേസമയം സ്കൂളുകള് കൊളേജുകള്‍ ബാറുകള്‍, തിയറ്ററുകള്‍, സ്വിമ്മിംഗ് പൂളുകള്‍ മൃഗശാലകള്‍ എന്നിവ തുറക്കില്ല. ആളുകളെ പങ്കെടുപ്പിച്ച് രാഷ്ട്രീയ, സാംസ്‌കാരിക പരിപാടികള്‍ നടത്തുന്നതിനും വിലക്കുണ്ട്.
അന്തര്‍ സംസ്ഥാന ബസുകള്‍ തുടങ്ങിയിട്ടില്ലെങ്കിലും പോണ്ടിച്ചേരിയിലേക്ക് സര്‍വ്വീസ് ആരംഭിക്കുമെന്ന് സര്‍ക്കാര്‍ അറിയിച്ചു.
