എച്ച്ഡിഎഫ്‌സിയും പേടിഎമ്മും ഒന്നിക്കുന്നു; പുതിയ ക്രെഡിറ്റ് കാര്‍ഡുകള്‍ ഒക്ടോബറില്‍
മുംബൈ: എച്ച്ഡിഎഫ്‌സി ബാങ്കും പേടിഎമ്മും ഒക്ടോബറില്‍ വിസ നെറ്റ്വര്ക്കിന്റെ ഭാഗമായുള്ള ക്രഡിറ്റ് കാര്‍ഡുകള്‍ പുറത്തിറക്കും. റീടെയ്ല്‍ ഉപഭോക്താക്കളുടെ ആഗ്രഹങ്ങളും ആവശ്യങ്ങളും നിവര്‍ത്തിക്കാന്‍ ലക്ഷ്യമിട്ടുള്ളതാണ് ഈ നീക്കം. മികച്ച ക്യാഷ്ബാക്കും ഏറ്റവും മികച്ച റിവാര്‍ഡുകളും നല്കി കൂടുതല്‍ ഉപഭോക്താക്കളെ കണ്ടെത്തുകയാണ് ലക്ഷ്യം.
ഒക്ടോബറില്‍ പുതിയ കാര്‍ഡുകള്‍ വിപണിയിലിറക്കാനാണ് കമ്പനികളുടെ തീരുമാനം. ഓണ്‍ലൈന്‍ ഫെസ്റ്റീവ് സീസണുകളില്‍ ലാഭം കൊയ്യുകയെന്ന ലക്ഷ്യം ഇതിലുണ്ട്. ഇഎംഐ, വാങ്ങുന്ന ഉല്‍പ്പന്നങ്ങള്‍ക്ക് പിന്നീട് പണം നല്‍കിയാല്‍ മതിയെന്ന ആനുകൂല്യം ഇതെല്ലാം ഇത്തരം കാര്‍ഡുകളിലേക്ക് ഉപഭോക്താക്കളെ ആകര്‍ഷിക്കുന്നുണ്ട്.
രാജ്യത്ത് കാര്‍ഡ് വഴി നടക്കുന്ന ഇടപാടുകളില്‍ മൂന്നിലൊന്നും എച്ച്ഡിഎഫ്‌സി ബാങ്ക് ഉപഭോക്താക്കളാണ്. അതിനാല്‍ തന്നെ എച്ച്ഡിഎഫ്‌സിയുമായി പങ്കാളിത്ത ബിസിനസിലേക്ക് പോകുന്നത് തങ്ങള്‍ക്കും കൂടുതല്‍ നേട്ടമാകുമെന്ന് പേടിഎമ്മും കാണുന്നു. ടയര്‍ 2, ടയര്‍ 3 വിപണികളില്‍ മികച്ച വളര്‍ച്ച നേടാനും പേമെന്റിന്റെ ഡിജിറ്റല്‍വത്കരണം രാജ്യത്ത് കൂടുതല്‍ വ്യാപിപ്പിക്കാനും സാധിക്കുമെന്നും കമ്പനികള്‍ കണക്കുകൂട്ടുന്നു
