ഡോ. നിഖില്‍ ഒ. ഗോവിന്ദന്‍
ഒരു നേര്‍ത്ത പുഞ്ചിരിക്ക് ലോകത്തെ മാറ്റാന്‍ കഴിയും. എന്നാല്‍ പലര്‍ക്കും ആ പുഞ്ചിരി ഒരു സ്വപ്നം മാത്രമായി അവശേഷിക്കാറുണ്ട്. മുഖത്തെ വൈകല്യങ്ങള്‍, ജന്മനാലുള്ള വൈകല്യങ്ങള്‍ (മുച്ചിറി, മുറിയണ്ണാക്ക്) അപകടങ്ങളില്‍ സംഭവിക്കുന്ന പരിക്കുകള്‍, അല്ലെങ്കില്‍ ക്യാന്‍സര്‍ പോലുള്ള രോഗങ്ങള്‍ ഇവയെല്ലാം കാരണം തങ്ങളുടെ സ്വാഭാവിക പുഞ്ചിരി നഷ്ടപ്പെട്ട ലക്ഷക്കണക്കിന് ആളുകള്‍ നമുക്ക് ചുറ്റുമുണ്ട്. ഇന്ന് അതായത് ഒക്ടോബറിലെ ആദ്യ വെള്ളിയാഴ്ച ലോകം വേള്‍ഡ് സ്മൈല്‍ ഡേ (World Smile Day) ആയി ആഘോഷിക്കുകയാണ്.
നഷ്ടപ്പെട്ടുപോയ പുഞ്ചിരികള്‍ തിരികെ നല്‍കാന്‍ അഹോരാത്രം പ്രയത്നിക്കുന്ന ഒപ്റ്റിമല്‍ ആരോഗ്യ മേഖലയാണ് ഓറല്‍ ആന്‍ഡ് മാക്സിലോഫേഷ്യല്‍ സര്‍ജറി (Oral and Maxillofacial Surgery - OMFS).
പല്ലുകള്‍, താടിയെല്ല്, വായ, മുഖത്തിന്റെ ഘടന, കഴുത്ത് എന്നിവയെ ബാധിക്കുന്ന രോഗങ്ങള്‍, പരിക്കുകള്‍, വൈകല്യങ്ങള്‍ എന്നിവ നിര്‍ണ്ണയിക്കുകയും അവ ശസ്ത്രക്രിയയിലൂടെ പരിഹരിക്കുകയും ചെയ്യുന്ന ഒരു സവിശേഷ ദന്തവൈദ്യശാസ്ത്ര-വൈദ്യശാസ്ത്ര ശാഖയാണിത്. കേവലം സൗന്ദര്യം വര്‍ദ്ധിപ്പിക്കുക മാത്രമല്ല, ഒരു വ്യക്തിക്ക് സാധാരണ രീതിയില്‍ ഭക്ഷണം കഴിക്കാനും സംസാരിക്കാനും ആത്മവിശ്വാസത്തോടെ സമൂഹത്തെ അഭിമുഖീകരിക്കാനും മാക്സിലോഫേഷ്യല്‍ സര്‍ജ്ജന്മാരുടെ സേവനം അനിവാര്യമാണ്.
മുഖത്തുണ്ടാകുന്ന ചെറിയൊരു മാറ്റം പോലും മനുഷ്യന്റെ മാനസികാവസ്ഥയെയും ആത്മവിശ്വാസത്തെയും വല്ലാതെ ബാധിക്കാറുണ്ട്. മുച്ചിറി, മുറിയണ്ണാക്ക് എന്നിവയുമായി ജനിക്കുന്ന കുട്ടികള്‍ക്ക് കൃത്യമായ പ്രായത്തില്‍ മാക്സിലോഫേഷ്യല്‍ ശസ്ത്രക്രിയ നല്‍കുന്നതിലൂടെ അവര്‍ക്ക് മനോഹരമായ ഒരു പുഞ്ചിരിയും മികച്ച ജീവിതവും സമ്മാനിക്കാന്‍ സാധിക്കുന്നു.
കാരുണ്യപ്രവര്‍ത്തികളിലൂടെയും സ്നേഹത്തിലൂടെയും മറ്റുള്ളവരുടെ മുഖത്ത് പുഞ്ചിരി വിരിയിക്കുക എന്നതാണ് വേള്‍ഡ് സ്മൈല്‍ ഡേയുടെ പ്രധാന ലക്ഷ്യം. മാക്സിലോഫേഷ്യല്‍ സര്ജന്മാര് തങ്ങളുടെ കരിയറിലുടനീളം ചെയ്യുന്നത് ഇതേ കാര്യമാണ്. മെഡിക്കല്‍ സയന്‍സിന്റെയും സാങ്കേതികവിദ്യയുടെയും സഹായത്തോടെ അവര്‍ മറ്റുള്ളവരുടെ ജീവിതത്തിലേക്ക് സന്തോഷം തിരികെ കൊണ്ടുവരുന്നു.
നമുക്കും ഈ ദിനത്തില്‍ പങ്കാളികളാകാം. വൈകല്യങ്ങള്‍ കാരണം പുഞ്ചിരിക്കാന്‍ മടിക്കുന്നവര്‍ക്ക് ആധുനിക ചികിത്സാ രീതികളെക്കുറിച്ച് അവബോധം നല്‍കാനും, അവരെ ചേര്‍ത്തുപിടിക്കാനും നമുക്ക് സാധിക്കണം. എല്ലാവര്ക്കും മനോഹരമായ, ആരോഗ്യമുള്ള ഒരു പുഞ്ചിരി സ്വന്തമാക്കാന്‍ കഴിയുന്ന ഒരു ലോകത്തിനായി നമുക്ക് ഒന്നിച്ച് നില്‍ക്കാം
