ഒരു പുരുഷന്‍ ഒന്നിലധികം സ്ത്രീകളെ വിവാഹം കഴിച്ച് ഒരുമിച്ച് താമസിക്കുന്നത് രാജ്യത്ത് പുതിയ കഥയൊന്നുമല്ല. നല്ല നയതന്ത്രജ്ഞരായിരിക്കണം ഭര്‍ത്താക്കന്മാര്‍ എന്നുമാത്രം. എന്നാല്‍ ഹരിയാനക്കാരനായ ബഹു ഭാര്യത്വമുള്ള ഭര്‍ത്താവിന്റെ കഥ ഇതില്‍ നിന്നെല്ലാം വ്യത്യസ്തമാണ്. ഭാര്യമാര്‍ക്ക് വേണ്ടി ആഴ്ചയിലെ ദിവസങ്ങളെ കൃത്യമായി വീതിച്ചു നല്‍കുകയാണ് ഇയാള്‍. മധ്യപ്രദേശിലെ ഗ്വാളിയോറില്‍ കുടുംബ കോടതിയില്‍ വന്ന ഈ അപൂര്‍വ്വ കുടുംബ കഥ കൗണ്‍സിലറായ ഹരീഷ് ദേവനാണ് പ്രാദേശിക മാധ്യമങ്ങള്‍ക്ക് നല്കിയ ഒരു അഭിമുഖത്തില്‍ പങ്കുവെച്ചത്. ഹരിയാനയിലാണ് ഈ കുടുംബം ഇപ്പോള്‍ താമസിക്കുന്നത്. ആഴചയില്‍ ഭര്‍ത്താവിന്റെ മൂന്ന് ദിവസങ്ങള്‍ വീതമാണ് ഭാര്യമാര്‍ വീതിച്ചെടുത്തത്. ശേഷിച്ച ഒരു ദിവസം അവര്‍ ഭര്‍ത്താവിന് സ്വന്തമായി നല്കി. ഈ ദിവസം ഭര്‍ത്താവിന് ഇഷ്ടമുള്ളത് പോലെ എന്ത് വേണമെങ്കിലും ചെയ്യാം.
ഹരിയാനയിലെ ഗുരുഗ്രാമില്‍ ജോലി ചെയ്യുന്ന ഒരു യുവ എഞ്ചിനിയറാണ് ഈ കഥയിലെ നായകന്‍. ഇദ്ദേഹം 2018 ലാണ് ഗ്വാളിയോര്‍ സ്വദേശിനിയായ 28 വയസ്സുള്ള സീമ എന്ന യുവതിയെ വിവാഹം കഴിച്ചത്. വിവാഹ ശേഷം രണ്ട് വര്‍ഷക്കാലത്തോളം ഇരുവരും ഒരുമിച്ച് താമസിച്ചു. ഇതിനിടയില്‍ ഇവര്‍ക്ക് ഒരു ആണ്‍ കുഞ്ഞ് പിറന്നു. അങ്ങനെയിരിക്കുന്നതിടെ 2020-ല്‍ കൊറോണയുമായി ബന്ധപ്പെട്ട് സര്‍ക്കാര്‍ ലോക്ഡൗണ്‍ പ്രഖ്യാപിച്ചു.
ഈ സമയത്ത് സീമയെ അവളുടെ ജന്മനാടായ ഗ്വാളിയോറില്‍ അദ്ദേഹം എത്തിച്ചു. എന്നാല്‍ , സര്‍ക്കാര്‍ ലോക്ഡൗണ്‍ പിന്‍വലിച്ചെങ്കിലും അയാള്‍ ഭാര്യയെ തിരികെ കൊണ്ട് വന്നില്ല. ഇതിനിടയില്‍ തന്നോടൊപ്പം ജോലി ചെയ്യുന്ന മറ്റൊരു യുവതിയുമായി അയാള്‍ പ്രണയത്തിലായി. അവരുടെ അടുപ്പം വളര്‍ന്നതോടെ ഇരുവരും ലിവിംഗ് ടുഗതര്‍ ആരംഭിച്ചു. ആ ബന്ധത്തില്‍ അവര്‍ക്ക് ഒരു കുഞ്ഞും പിറന്നു. പിന്നാലെ അയാള്‍ തന്റെ സഹപ്രവര്‍ത്തകയെ വിവാഹം കഴിച്ചു. എന്നാല്‍ ആദ്യ ഭാര്യയായ സീമയുമായുള്ള ബന്ധം വേര്‍പെടുത്തിയുമില്ല.
ഈ വിവരം അറിഞ്ഞ ആദ്യ ഭാര്യയായ സീമ മടങ്ങിയെത്തുകയും ഇരുവരും തമ്മില്‍ വലിയ വാക്ക് തര്‍ക്കം ഉണ്ടാകുകയും ചെയ്തു. തുടര്‍ന്ന് തിരികെ സ്വന്തം വീട്ടിലെത്തിയ സീമ ഭര്‍ത്താവിനെതിരെ കേസ് കൊടുത്തു. കേസ് കുടുംബ കോടതിയില്‍ എത്തിയതോടെ പ്രശ്‌ന പരിഹാരത്തിനായി കോടതി ഇരുവരെയും വിളിച്ചു വരുത്തി. ഒടുവില്‍, തങ്ങളുടെ കുട്ടിയുടെ ഭാവിയെ കരുതി കേസ് രമ്യതയില്‍ പരിഹരിക്കാന്‍ ഇരുവരും തീരുമാനിച്ചു. അങ്ങനെ ഭര്‍ത്താവിനൊപ്പം മടങ്ങിപ്പോകാന്‍ സീമ തീരുമാനിച്ചു. കോടതിയുടെ നിര്‍ദ്ദേശ പ്രകാരം ആഴ്ചയെ തുല്യമായി രണ്ട് ഭാര്യമാര്‍ക്കുമായി നല്‍കിയിരിക്കുകയാണ് ഇപ്പോള്‍ ഭര്‍ത്താവ്. ഭാര്യമാര്‍ക്കായി രണ്ട് ഫ്‌ളാറ്റുകളും എടുത്തു. ആഴ്ചയുടെ ആദ്യത്തെ മൂന്ന് ദിവസം ഇയാള്‍ ആദ്യ ഭാര്യയ്ക്കും കുട്ടിക്കുമൊപ്പവും ജീവിക്കും. അടുത്ത മൂന്ന് ദിവസങ്ങള്‍ രണ്ടാം ഭാര്യയ്ക്കും കുഞ്ഞിനുമൊപ്പമാണ് കഴിയുക. ഞായറാഴ്ചകള്‍ ഇയാള്‍ക്ക് സ്വന്തമായി എടുക്കാം.
