തിരുവനന്തപുരം: മനുഷ്യക്കടത്തും നിര്ബന്ധിത മതപരിവര്ത്തനവും ആരോപിച്ച് ഛത്തീസ്?ഗഡില് മലയാളി കന്യാസ്ത്രീകളെ അറസ്റ്റ് ചെയ്ത സംഭവത്തില് പ്രതിഷേധം ശക്തമാകുന്നു. അറസ്റ്റില് പ്രതിഷേധിച്ച് രാജ്ഭവനിലേക്ക് ക്രൈസ്തവസഭകള് മാര്ച്ച് നടത്തി. സംഭവത്തില് വിവിധ സഭകള് സംയുക്തമായിട്ടാണ് പ്രതിഷേധിക്കുന്നത്. കെസിബിസി അധ്യക്ഷന് മാര് ക്ലീമ്മിസിന്റെ നേതൃത്വത്തില് കറുത്ത തുണി കൊണ്ട് വാ മൂടിക്കെട്ടിയാണ് പ്രതിഷേധം. പാളയത്തെ രക്തസാക്ഷി മണ്ഡപത്തില് നിന്നാണ് പ്രതിഷേധമാര്ച്ച് നടത്തിയത്. വൈദികരും സന്യാസ സഭാംഗങ്ങളും വിശ്വാസികളുമുള്പ്പെടെ നിരവധി പേരാണ് മാര്ച്ചില് പങ്കെടുത്തത്.
കന്യാസ്ത്രീകളുടെ മോചനം എത്രയും വേഗം സാധ്യമാക്കണമെന്നാണ് ആവശ്യപ്പെടുന്നത്. ഇവരെ ജയിലിലടച്ചിട്ട് ഇന്ന് 6 ദിവസം പൂര്ത്തിയാകുന്നു. കന്യാസ്ത്രീകളുടെ ജാമ്യാപേക്ഷ ഇന്നലെ കോടതി തള്ളിയിരുന്നു. ഛത്തീസ്ഗഡ് സെഷന്സ് കോടതിയും കന്യാസ്ത്രീകളുടെ ജാമ്യാപേക്ഷ പരിഗണിച്ചില്ല. എന്ഐഎ കോടതിയിലേക്ക് കേസ് മാറ്റിയിരിക്കുകയാണ്. തുടര്ന്ന് പരസ്യ പ്രതിഷേധത്തിലേക്കും ശക്തമായ നിലപാടിലേക്കും എത്തിയിരിക്കുകയാണ് ക്രൈസ്തവ സഭ.
കഴിഞ്ഞ വെള്ളിയാഴ്ചയാണ് സഭയ്ക്ക് കീഴിലെ സ്ഥാപനങ്ങളിലേക്ക് ജോലിക്കായി മൂന്ന് പെണ്കുട്ടികളെ കൂട്ടിക്കൊണ്ടുപോകാന് വന്ന രണ്ട് മലയാളി കന്യാസ്ത്രീകളെ ഛത്തീസ്ഗഡിലെ ദുര്ഗില് വെച്ച് അറസ്റ്റ് ചെയ്തത്. മനുഷ്യക്കടത്ത്, നിര്ബന്ധിത മതപരിവര്ത്തനം എന്നിവ ആരോപിച്ചാണ് ബജ്റംഗ്ദള് പ്രവര്ത്തകര് ദുര്ഗ് റെയില്വേ സ്റ്റേഷനില് തടഞ്ഞു വച്ചത്. കന്യാസ്ത്രീകള്ക്ക് എതിരെ പോലീസ് ചുമത്തിയത് ഗുരുതര വകുപ്പുകളാണ്. മനുഷ്യക്കടത്തും, നിര്ബന്ധിത മത പരിവര്ത്തനവും അടക്കം 10 വര്ഷം വരെ തടവുശിക്ഷ കിട്ടാവുന്ന കുറ്റങ്ങള് ചുമത്തിയാണ് എഫ്ഐആര് തയ്യാറാക്കിയത്.
