ഷാരൂഖില്‍ നിന്ന് പണം തട്ടാന്‍ ശ്രമിച്ചെന്ന കേസ്; സമീര്‍ വാംഗഡെയ്‌ക്കെതിരെ അന്വേഷണം ആരംഭിച്ചു
മുംബൈ: ഷാരൂഖ് ഖാനെ ഭീഷണിപ്പെടുത്തി പണം തട്ടാന്‍ ശ്രമിച്ചെന്ന ആരോപണത്തില്‍ എന്‍സിബി സോണല്‍ ഡയറക്ടര്‍ സമീര്‍ വാംഗഡെയ്ക്ക് എതിരെ മുംബൈ പൊലീസ് അന്വേഷണം തുടങ്ങി. എസിപി റാങ്കിലുള്ള ഉദ്യോഗസ്ഥനെ അന്വേഷണത്തിനായി ചുമതലപ്പെടുത്തി. മുംബൈയിലെ അഞ്ച് സ്റ്റേഷനുകളില് പരാതികള്‍ ലഭിച്ച സാഹചര്യത്തിലാണ് മുംബൈ പൊലീസ് സമീര്‍ വാംഗഡെയ്ക്ക് എതിരെ അന്വേഷണം തുടങ്ങിയത്. അതേസമയം സമീറിനെ ചോദ്യം ചെയ്യാനായി എന്‍സിബിയുടെ വിജിലന്‍സ് സംഘവും മുംബൈയിലെത്തി. സമീര്‍ വാംഗഡെയെ ഇന്ന് തന്നെ സംഘം ചോദ്യം ചെയ്‌തേക്കും.
സമീറിനെതിരെ വെളിപ്പെടുത്തല്‍ നടത്തിയ ആര്യന് കേസിലെ സാക്ഷിയായ പ്രഭാകര്‍ സെയ്‌ലിന്റെ മൊഴി അന്വേഷണ സംഘം രേഖപ്പെടുത്തിക്കഴിഞ്ഞു. പ്രഭാകര്‍ സെയ്‌ലിനോടും എന്‍സിബി ഓഫീസില്‍ എത്താന്‍ ആവശ്യപ്പെട്ടിട്ടുണ്ട്. പ്രഭാകര്‍ പറഞ്ഞത് പ്രകാരം ഷാരൂഖ് ഖാന്റെ മാനേജറെ ഇടനിലക്കാര്‍ കണ്ട സ്ഥലത്തെ സിസിടിവി ദൃശ്യങ്ങളും ശേഖരിച്ചു. ഒളിവില്‍ പോയ കേസിലെ സാക്ഷിയായ കിരണ്‍ ഗോസാവിക്കായും തെരച്ചില്‍ തുടങ്ങി. അതേസമയം സമീറിന്റെ ഫോണ്‍ രേഖകള്‍ പരിശോധിക്കണമെന്ന് എന്‍സിപി മന്ത്രി നവാബ് മാലിക്ക് ആവശ്യപ്പെട്ടു. പ്രതികളുമായുള്ള സമീറിന്റെ ബന്ധം ഇതിലൂടെ വ്യക്തമാവുമെന്നും അദ്ദേഹം പറഞ്ഞു. ആര്യന് ഖാന്റെ ജാമ്യാപേക്ഷയില്‍ ഇന്ന് ബോബെ ഹൈക്കോടതിയില്‍ വാദം തുടരും.
