തിരുവനന്തപുരം: സിപിഎമ്മിനും ബിജെപിക്കും മുന്നറിയിപ്പുമായി പ്രതിപക്ഷ നേതാവ് വിഡി സതീശന്. കേരളം ഞെട്ടുന്ന ഒരു വാര്ത്ത വരും, സിപിഎം കാത്തിരിക്കൂ എന്നാണ് സതീശന്റെ മുന്നറിയിപ്പ്. ബിജെപി പ്രതിഷേധത്തിന് ഉപയോഗിച്ച കാളയെ ഉപേക്ഷിക്കരുതെന്നും കാളയുമായി വൈകാതെ ബിജെപി അധ്യക്ഷന്റെ വീട്ടിലേക്ക് പ്രകടനം നടത്തേണ്ടി വരുമെന്നാണ് ബിജെപിയെ സതീശന് വെല്ലുവിളിക്കുന്നത്. രാഹുല് മാങ്കൂട്ടത്തിലിന്റെ വിവാദം അടഞ്ഞ അധ്യായമെന്നും സതീശന് പ്രതികരിച്ചു. അതേസമയം, ഒരു പേടിയുമില്ലെന്നായിരുന്നു സിപിഎമ്മിന്റെയും ബിജെപിയുടെയും പ്രതികരണം.
സിപിഎമ്മുകാര് അധികം കളിക്കരുതെന്നും ഞെട്ടിക്കുന്ന വാര്ത്ത അധികം വൈകാതെ തന്നെ പുറത്തുവരുമെന്നും അദ്ദേഹം വാര്ത്താ സമ്മേളനത്തില് പറഞ്ഞു. എം വി ഗോവിന്ദന്റെ മകനെതിരായ ഗുരുതര ആരോപണം മറയ്ക്കാനാണ് സിപിഎം ശ്രമം രാഹുല് മാങ്കൂട്ടത്തിലിന്റെ വിവാദം സിപിഎം ചര്ച്ചയാക്കുന്നത്. സിപിഎം അധികം അഹങ്കരിക്കേണ്ട, ചിലത് വാരാനുണ്ടെന്നാണ് സതീശന് മുന്നറിയിപ്പ് നല്കുന്നത്. പല കാര്യങ്ങളും ഉടന് പുറത്ത് വരുമെന്ന് വി ഡി സതീശന് മാധ്യമങ്ങളോട് പറഞ്ഞു. തന്റെ വീട്ടിലേക്കുള്ള മാര്ച്ചിനായി കൊണ്ടുവന്ന കാളയുമായി ബിജെപി സംസ്ഥാന പ്രസിഡണ്ടിന്റെ വീട്ടിലേക്ക് മാര്ച്ച് നടത്തേണ്ട സ്ഥിതിയുണ്ടാകുമെന്നും സതീശന് മുന്നറിയിപ്പ് നല്കുന്നു. കോഴിക്കോട് മാധ്യമങ്ങളോട് സംസാരിക്കുകയായിരുന്ന പ്രതിപക്ഷ നേതാവ്. ജിഎസ് ടിയില് വന് അഴിമതിയാണ് നടക്കുന്നത്. സര്ക്കാരിലേക്ക് വരേണ്ട തുക ഇടനിലക്കാരെ വെച്ച് കൊള്ള ചെയ്യുന്നുവെന്നും സതീശന് ആരോപിച്ചു.
