5ജി ഫോണുമായി ഒപ്പോയും, റെനോ 5 പ്രോ 5ജി ലോഞ്ച് ഈ മാസം 18ന്
5ജി കണക്ടിവിറ്റി ഇന്ത്യയെ സംബന്ധിച്ച് ഇപ്പോഴും അകലെയാണെങ്കിലും 5ജി കണക്ടിവിറ്റിയുള്ള സ്മാര്‍ട്ട്‌ഫോണുകള്‍ വില്പനക്കെത്തിക്കുന്നതില്‍ നിന്നും പ്രമുഖ ബ്രാന്‍ഡുകളെ ഇത് പിന്തിരിപ്പിക്കുന്നില്ല. ഐഫോണ്‍ 12, വണ്‍പ്ലസ് 8 പ്രോ, എംഐ 10 ശ്രേണി, റിയല്‍മി X50 പ്രോ 5ജി, വണ്‍പ്ലസ് നോര്‍ഡ്, വിവോ V20 പ്രോ, മോട്ടോ ജി 5ജി എന്നിങ്ങനെ പോകുന്ന ഇന്ത്യയിലെ 5ജി സ്മാര്ട്ട്ഫോണ് ശ്രേണിയിലേക്ക് ഒപ്പോ കൂടുതല്‍ ഫോണുകള്‍ അവതരിപ്പിക്കുയാണ്. റെനോ 5 പ്രോ 5ജിയാണ് ഒപ്പോയുടെ പുത്തന്‍ താരം.
ഈ മാസം 18-നാണ് ഒപ്പോ 5 പ്രോ 5ജി വില്പനക്കെത്തുക. കഴിഞ്ഞ മാസമാണ് ഒപ്പോ റെനോ 5 സീരീസ് ചൈനയില്‍ അവതരിപ്പിച്ചത്. റെനോ 5 5ജി, റെനോ 5 പ്രോ 5ജി, Reno 5 പ്രോ+ 5ജി എന്നിങ്ങനെ 3 ഫോണുകളുള്ള പുത്തന്‍ ശ്രേണിയില്‍ നിന്നും റെനോ 5 പ്രോ 5ജി മാത്രമാവും തത്കാലം ഇന്ത്യയിലെത്തുക. വരും മാസങ്ങളില്‍ ബാക്കിയുള്ള രണ്ട് മോഡലുകളും ഒപ്പോ അവതരിപ്പിച്ചേക്കും.
ഒപ്പോ റെനോ 5 പ്രോ 5ജി
8 ജിബി റാം + 128 ജിബി സ്റ്റോറേജ് വേരിയന്റിന് 3,399 യെന്‍ (ഏകദേശം 38,200 രൂപ), 12 ജിബി റാം + 256 ജിബി സ്റ്റോറേജ് ഓപ്ഷന് 3,799 യെന്‍ (ഏകദേശം 42,700 രൂപ) എന്നിങ്ങനെയാണ് ഒപ്പോ റെനോ 5 പ്രോ 5ജിയുടെ ചൈനയിലെ വില. ഇന്ത്യയില്‍ 35,000 രൂപയ്ക്കും 40,000 രൂപയ്ക്കും ഇടയിലാണ് ഒപ്പോ റെനോ 5 പ്രോ 5ജിയുടെ വില പ്രതീക്ഷിക്കുന്നത്. അറോറ ബ്ലൂ, മൂണ്‍ലൈറ്റ് നെറ്റ്, സ്റ്റാറി നൈറ്റ് എന്നിങ്ങനെ മൂന്ന് നിറങ്ങളില്‍ ഒപ്പോ റെനോ 5 പ്രോ 5ജി ലഭിക്കും.
ഡ്യുവല്‍ സിം (നാനോ) സ്മാര്ട്ട്ഫോണ് ആയ ഓപ്പോ റെനോ 5 പ്രോ 5ജി, ആന്‍ഡ്രോയിഡ് 11 അടിസ്ഥാനമായ കളര്‍ ഒഎസ് 11.1 ഓപ്പറേറ്റിംഗ് സിസ്റ്റത്തില്‍ ആണ് പ്രവര്‍ത്തിക്കുന്നത്. 6.55 ഇഞ്ച് ഫുള്‍ എച്ച്ഡി + (1,080x2,400 പിക്സല്‍) ഒഎല്‍ഇഡി കര്‍വ്ഡ് ഡിസ്പ്ലേയ്ക്ക് 90 ഹെര്‍ട്‌സ് റിഫ്രഷ് റേറ്റും, 92.1 ശതമാനം സ്‌ക്രീന്‍-ടു-ബോഡി അനുപാതം, 402 പിപി പിക്സല്‍ ഡെന്‍സിറ്റിയുമുണ്ട്. ARM G77 MC9 ജിപിയുവുമായി ചേര്‍ന്ന് പ്രവര്‍ത്തിക്കുന്ന മീഡിയടെക് ഡൈമെന്‍സിറ്റി 1000+ SoC പ്രോസസ്സര്‍ ആണ് ഹാന്‍ഡ്‌സെറ്റിന്.
ക്വാഡ് റിയര്‍ ക്യാമറയാണ് ഒപ്പോ റെനോ 5 പ്രോ 5ജിയില്‍. എഫ് / 1.7 ലെന്‍സുള്ള 64 മെഗാപിക്സല് പ്രൈമറി സെന്‍സര്‍, എഫ് / 2.2 ലെന്‍സുള്ള 8 മെഗാപിക്സല് അള്‍ട്രാ വൈഡ് ആംഗിള്‍ സെന്‍സര്‍, എഫ് / 2.4 ലെന്‍സുള്ള 2-മെഗാപിക്സല് മാക്രോ ഷൂട്ടര്‍, എഫ് / 2.4 ലെന്‍സുള്ള 2 മെഗാപിക്സല് പോര്‍ട്രെയിറ്റ് ഷൂട്ടര്‍ എന്നിവ ചേര്‍ന്നതാണ് കാമറ സെറ്റപ്പ്. സെല്‍ഫികള്‍ക്കായി, സ്‌ക്രീനിന്റെ മുകളില്‍ ഇടത് കോണില്‍ സ്ഥാപിച്ചിരിക്കുന്ന ഹോള്‍-പഞ്ച് ക്യാമറയില്‍ 32 മെഗാപിക്സല് സെന്‍സറാണ്.
256 ജിബി വരെ ഓണ്‍ബോര്‍ഡ് സ്റ്റോറേജ് ഫോണിനുണ്ട്. 65W ഫാസ്റ്റ് ചാര്‍ജിംഗിനെ പിന്തുണയ്ക്കുന്ന 4,350mAh ബാറ്ററിയാണ് ഒപ്പോ റെനോ 5 പ്രോ 5ജിയില്‍.കണക്റ്റിവിറ്റി ഓപ്ഷനുകളില്‍ ഡ്യുവല്‍-ബാന്‍ഡ് വൈ-ഫൈ, ബ്ലൂടൂത്ത് 5.1, ജിപിഎസ് / എ-ജിപിഎസ്, ഗ്ലോനാസ്, 3.5 എംഎം ഹെഡ്ഫോണ്‍ ജാക്ക്, ചാര്‍ജ് ചെയ്യുന്നതിനായി യുഎസ്ബി ടൈപ്പ്-സി പോര്‍ട്ട് എന്നിവ ഉള്‍പ്പെടുന്നു. ജിയോ മാഗ്‌നറ്റിക് സെന്‍സര്‍, പ്രോക്സിമിറ്റി സെന്‍സര്‍, ആക്സിലറോമീറ്റര്‍, ഗ്രാവിറ്റി സെന്‍സര്‍, ഗൈറോസ്‌കോപ്പ് എന്നീ സെന്‍സറുകളും ഇന്‍ ഡിസ്പ്ലേ ഫിംഗര്‍പ്രിന്റ് സ്‌കാനറും ഫോണിലുണ്ട്.
