ബ്രേക്ക്ഫാസ്റ്റിന് രുചികരമായ 'ഓട്സ് ദോശ'
ഏത് പ്രായക്കാര്‍ക്കും കഴിക്കാവുന്ന ഭക്ഷണമാണ് ഓട്സ്. എല്ലുകളുടെ വളര്‍ച്ചയ്ക്ക് സഹായകരമായ വിറ്റാമിന്‍ ബി കൂടിയ തോതില്‍ ഓട്സില്‍ അടങ്ങിയിട്ടുണ്ട്. ?ഗോതമ്പില്‍ അടങ്ങിയിട്ടുള്ളതിനെക്കാളും കാത്സ്യം, പ്രോട്ടീന്‍, ഇരുമ്പ്, സിങ്ക്, തയാമിന്‍, വിറ്റാമിന്‍ ഇ എന്നിവ ഓട്സില്‍ അടങ്ങിയിട്ടുണ്ട്.
ഉയര്‍ന്ന കൊളസ്ട്രോള്‍ ഉള്ളവര്‍ക്ക് അനുയോജ്യമായ ഭക്ഷണമാണ് ഓട്സ്. അമിതമായ കൊളസ്ട്രോള്‍ ധമനികളുടെ ഭിത്തിയില്‍ വരുകയും അവയെ തടയുകയും ചെയ്യുന്നു. പ്രാതലിന് ഓട്സ് ഉള്‍പ്പെടുത്തുന്നത് കൂടുതല്‍ ഊര്‍ജം നല്‍കുന്നു. ഇനി മുതല്‍ സാധാരണ ദോശയ്ക്ക് പകരം ഇടയ്‌ക്കൊക്കെ ഓട്സ് ദോശയും ഈസിയായി തയ്യാറാക്കാം....വളരെ പെട്ടെന്ന് തയാറാക്കാവുന്ന ഓട്സ് ദോശ റെസിപ്പിയാണ് താഴേ പങ്കുവച്ചിരിക്കുന്നത്....
വേണ്ട ചേരുവകള്‍
ഓട്സ് പൊടിച്ചത് 1 കപ്പ്
റവ 1/4 കപ്പ്
അരിപ്പൊടി അരക്കപ്പ്
ഉപ്പ് ആവശ്യത്തിന്
പച്ചമുളക് 2 എണ്ണം
കറിവേപ്പില ആവശ്യത്തിന്
ഇഞ്ചി 1/4 ടേബിള്‍സ്പൂണ്‍
കശുവണ്ടി പരിപ്പ് 5 എണ്ണം
കുരുമുളക് അല്‍പം
കായപ്പൊടി 1 നുള്ള്
ജീരകപ്പൊടി 1/4 ടേബിള്‍സ്പൂണ്‍
വെള്ളം 2 കപ്പ്
തയ്യാറാക്കുന്ന വിധം...
ആദ്യം ഒരു പാത്രത്തിലേക്ക് പൊടിച്ചുവച്ചിരിക്കുന്ന ഓട്സ്, റവ, അരിപ്പൊടി , കറിവേപ്പില , പച്ചമുളക് , ഇഞ്ചി ചതച്ചത്, കുരുമുളക് ചതച്ചത്, ജീരകപ്പൊടി, കായപ്പൊടി , ആവശ്യത്തിന് ഉപ്പ്, ചെറു കഷണങ്ങളാക്കിയ കശുവണ്ടി എന്നിവ ചേര്‍ത്ത് നന്നായി യോജിപ്പിച്ച് എടുക്കുക. അല്‍പസമയത്തിന് ശേഷം അതിലേക്ക് കുറച്ചുകുറച്ചായി വെള്ളം ചേര്‍ത്ത് ഇളക്കി ദോശ മാവ് പരിവത്തിലേക്ക് മാറ്റുക. വെള്ളം ചേര്‍ത്ത ശേഷം മാവ് പത്ത് മിനിറ്റ് നേരം അടച്ചു വയ്ക്കുക .അടുത്തതായി അടുപ്പിലേക്ക് പാന്‍ ചൂടാവാന്‍ വയ്ക്കുക. പാന്‍ നന്നായി ചൂടായി കഴിഞ്ഞാല്‍ മാവ് ഒട്ടും തന്നെ പരത്താതെ ഒഴിച്ചു കൊടുക്കുക. നന്നായി മൊരിഞ്ഞു വന്നതിനുശേഷം ദോശ മറിച്ചിടാം ..ഓട്സ് ദോശ തയാറായി...
