മികച്ച പ്രതികരണവുമായി കമലിന്റെ വിക്രം
ആരാധകര്‍ ആകാംക്ഷയോടെ കാത്തിരുന്ന ചിത്രം വിക്രം പ്രദര്‍ശനത്തിന് എത്തിയിരിക്കുന്നു. ലോകേഷ് കനകരാജ് സംവിധാനം ചെയ്ത ചിത്രത്തില്‍ കമല്‍ഹാസന്‍ എത്തിയപ്പോള്‍ എല്ലാവരും ആവേശത്തിലാണ്. ചിത്രത്തിന് മികച്ച പ്രതികരണമാണ് തിയറ്ററുകളില്‍ നിന്ന് ലഭിക്കുന്നത്. ബ്ലോക്ബസ്റ്ററാകും ചിത്രം എന്നാണ് സാമൂഹ്യ മാധ്യമങ്ങളില്‍ ചിത്രം കണ്ടവരുടെ പ്രതികരണം (Vikram audience response).
കമല്‍ഹാസന്‍ നായകായ പുതിയ ചിത്രം മികച്ച ഒരു തിയറ്റര്‍ എക്‌സ്പീരിയന്‍സ് ആണ് എന്നാണ് പ്രതികരണം. സൂര്യയുടെ അതിഥി വേഷം ഞെട്ടിച്ചുവെന്നും പ്രതികരണങ്ങള്‍ വരുന്നു. അന്താരാഷ്ട്ര നിലവരാത്തിലേക്ക് വിക്രം ചിത്രം എത്തിയെന്നുമാണ് അഭിപ്രായങ്ങള്‍. ചിത്രം ബ്ലോക്ബസ്റ്ററാകും എന്ന് പ്രതീക്ഷ പ്രകടിപ്പിച്ച് ചിത്രത്തിന്റെ നിര്‍മാതാക്കളിലൊരാളായ ഉദയനിധി സ്റ്റാലിന്‍ കഴിഞ്ഞ ദിവസം തന്നെ രംഗത്ത് എത്തിയിരുന്നു.
സൂപ്പര്‍, നന്ദി ഉലഗനായകന്‍ കമല്‍ഹാസന്‍ സാര്‍. മൊത്തം ടീമിനും നന്ദി. ഉറപ്പായും ബ്ലോക്ബസ്റ്റര്‍ എന്നാണ് ഉദയനിധി സ്റ്റാലിന്‍ കഴിഞ്ഞ ദിവസം ട്വീറ്റ് ചെയ്തത്. കമല്‍ഹാസനൊപ്പം 'വിക്രം' എന്ന ചിത്രത്തില്‍ മലയാളി താരങ്ങളും അഭിനയിക്കുന്നുണ്ട്. ഫഹദ്, കാളിദാസ് ജയറാം, നരേന്‍ തുടങ്ങിയവരാണ് ചിത്രത്തില്‍ അഭിനയിക്കുന്നത്. റിലീസിന് മുന്നേ കമല്‍ഹാസന്‍ ചിത്രം 200 കോടി ക്ലബില്‍ ഇടംനേടിയിരുന്നെന്നും റിപ്പോര്‍ട്ടുണ്ട്. വിവിധ ഭാഷകളിലെ ഒടിടി, സാറ്റലൈറ്റ് റൈറ്റ്‌സ് വിറ്റ ഇനത്തില്‍ 200 കോടി രൂപയിലധികം വിക്രം നേടിയതായിട്ടാണ് ട്രേഡ് അനലിസ്റ്റ് രമേഷ് ബാല ട്വീറ്റ് ചെയ്തിരിക്കുന്നത്.
കമല്‍ഹാസന്റെ 'വിക്ര'ത്തിന്റെ ഓഡിയോ റൈറ്റ്‌സ് സോണി മ്യൂസിക് സ്വന്തമാക്കിയിരുന്നു. വന്‍ തുകയ്ക്കാണ് കമല്‍ഹാസന്‍ ചിത്രത്തിന്റെ ഓഡിയോ റൈറ്റ്‌സ് സോണി മ്യൂസിക് സ്വന്തമാക്കിയതെന്നായിരുന്നു റിപ്പോര്‍ട്ടുകള്‍. കമല്‍ഹാസന്‍ തന്നെയാണ് വിക്രം സിനിമയുടെ പ്രധാന നിര്‍മ്മാതാവ്. രാജ്കമല്‍ ഫിലിംസ് ഇന്റര്‍നാഷണലിന്റെ ബാനറിലാണ് നിര്‍മാണം.
നൂറ്റിപത്ത് ദിവസങ്ങളാണ് വിക്രം' ഷൂട്ട് പൂര്‍ത്തിയാകാന്‍ എടുത്തത് എന്ന് ലോകേഷ് കനകരാജ് അറിയിച്ചിരുന്നു. ലോകേഷ് കനകരാജ് തന്നെയാണ് ചിത്രത്തിന്റെ തിരക്കഥ എഴുതിയതും. എഡിറ്റിംഗ് ഫിലോമിന്‍ രാജ്. സംഘട്ടന സംവിധാനം അന്‍പറിവ്. നൃത്തസംവിധാനം ദിനേശ്. പിആര്‍ഒ ഡയമണ്ട് ബാബു. ശബ്ദം സങ്കലനം കണ്ണന്‍ ഗണ്‍പത് ആണ്.
