'അടികിട്ടുന്നില്ല, വെടിയുണ്ട്'; കമല്‍ഹാസന്‍ ചിത്രത്തില്‍ വില്ലനായതിനെക്കുറിച്ച് ചെമ്പന്‍
കൊച്ചി: കമല്‍ഹാസന്‍ നായകനാകുന്ന ലോകേഷ് കനകരാജ് മാസ്റ്ററിന് ശേഷം സംവിധാനം ചെയ്യുന്ന തമിഴ് ചിത്രം 'വിക്ര' ത്തില്‍ വില്ലന്‍ വേഷത്തിലാണ് മലയാളിയുടെ പ്രിയനടന്‍ ചെമ്പന്‍ വിനോദ് എത്തുന്നത്. 'വിക്ര'ത്തിലെ കഥാപാത്രത്തെക്കുറിച്ച് ചോദിച്ചപ്പോള്‍ ചെമ്പന്‍ പറഞ്ഞ രസകരമായ മറുപടി ഇപ്പോള്‍ സോഷ്യല്‍ മീഡിയയില്‍ വൈറലാകുകയാണ്.
പുതിയ ചിത്രം 'ഭീമന്റെ വഴി'യുടെ പ്രമോഷനിടെയായിരുന്നു 'വിക്ര'ത്തിലെ വില്ലന്‍ വേഷത്തെ കുറിച്ച് ഒരു റിപ്പോര്‍ട്ടര്‍ ചെമ്പന്‍ വിനോദിനോട് തിരക്കിയത്. അതൊരു വില്ലന്‍ വേഷമാണ്. അത്രയേ എനിക്ക് പറയാന്‍ സംവിധായകന്‍ അനുവദിച്ചിട്ടുള്ളൂ, എന്നായിരുന്നു ചെമ്പന്‍ വിനോദ് ആദ്യം പ്രതികരിച്ചത്. തല്ലു കൊള്ളുന്ന വില്ലന്‍ വേഷമാണോ എന്നായിരുന്നു അടുത്ത ചോദ്യം. 'ഏയ്, അങ്ങനെ തല്ലു കൊള്ളുന്ന വില്ലന്‍ വേഷത്തില്‍ ഒന്നും നമ്മള്‍ പോയി തല വയ്ക്കില്ല. ഇത്രനാള് കാത്തിരുന്നു കിട്ടിയതല്ലേ, ഇവിടെ നിന്ന് അവിടെ വരെ പോയി, വെറുതെ അടികൊണ്ടൊന്നും വരില്ല. എന്തേലും ഒരു സിഗ്‌നേച്ചര്‍ അവിടെ കൊടുത്തിട്ടേ വരൂ. അടിയില്ല, എന്നെ എന്തോ വെടിവച്ചാണ് കൊല്ലുന്നത്. 'എന്നായിരുന്നു ചെമ്പന്റെ മറുപടി. വേദിയില്‍ ഇരിക്കുന്ന കുഞ്ചാക്കോ ബോബന്‍ അടക്കം ഇത് കേട്ട് ചിരിക്കുകയായിരുന്നു.
